En ceti tristo jorn que vint nos fére a rassovegniér la guerra en Ucrêna,  enmodâye il y at dejâ on an, nos nos betens de-couta les ucrêniens et tués celors que soffrant de ceta guerra avouèc les paroles de ceta chançon translatâye per Menjot de la Peca.

 

Lluís Llach i Granta, chantor catalan ‘l est vegnu u mondo lo 7 de mê 1948 a Gérone (Catalogne). Il est en premîra pllace dens la batalye por la cultura catalana contre lo franquisme; d'ense, il est yon des animators de la Nova Cançó (Novèla chançon, mouvement artistico et musical que, sot lo franquisme, at betâ en devant lo catalan dens lo mondo de la chançon tot en dènoncient les enjustices et la dictatura franquiste.

 

 Lo Gllar

Lluís Llach, 1977

 

            I

Les clloches de la môrt

Sonont lo gllar por la guèrra

Des três felys qu’on at pèrdus,

Les três clloches nêres.

 

Et lo mondo sè recuelye

Quand la dolor aprôche :

Vê-que encor três dolors

Que fôdrat sè rapelar.

 

Les clloches sonont lo gllar

Por les três boches cllôses :

Mâlhor u troubadour

Que quèsierêt les três notes !

 

Qui at ôtâ lo sôfllo

A cetos três côrps tant jouenos

Que n’aviant d’ôtro trèsor

Que la rêson de celos que plôront ?

 

Assassins de rêsons et de vies,

Que jamés vos èyéd repôs dens tot cen que vos réste a vivre

Et que tant que dens la môrt vos porsuivont noutres mèmouères !

 

 

            II

Uvréd-mè lo ventro,

Qu’ils trôvont icé repôs,

De mos cortils

Aportâd les ples gentes fllors.

Por celos homos, lé,

Chavâd-mè ben provond

Et dedens mon côrp

Grâvad lors noms.

 

Que pas una tempéta

Vegne troblar lo sono

De celos que sont môrts

Sen bèssiér la téta.

 

            III

Diéx-et-sèpt ans solament,

Et tè, tant viely ;

Jalox de la lumiére de sos uelys

T’âs volu lui cllôre les pârpiéres,

Mas de bada, câr tôs nos consèrvens ceta lumiére

Et noutros uelys champeront des èlujos dens tes nuets !

 

Diéx-et-sèpt ans solament,

Et tè, tant viely ;

Enveyox d’una biôtât tant jouena

T’âs volu lui arrapar los membros,

Mas de bada, câr nos consèrvens l’émâge de son côrp

Et châque nuet nos aprendrens a l’amar.

 

Diéx-et-sèpt ans solament

Et tè, tant viely ;

Pas capâblo d’un amôr come lo sin,

Te lui âs balyê la môrt por compagne,

Mas de bada, câr u nom de tot cen qu’il âme

Noutron côrp serat un ètèrnèl printemps.

 

 

            IV

La misère s’est fêta poète

Et at ècrit dens los champs

En fôrma de trenchiês,

Et los homos sont alâs vers eles…

Châcun devint parola

Du victoriox poèmo.